GPT-6 Astra × Higgsfield 設定指南

兩個付費訂閱，冇一個免費版夠用

好多教學跳過呢一段，但佢決定咗你做唔做得成。兩邊都要畀錢，兩邊嘅免費版都開唔到呢個流程。

• ChatGPT（跑 Astra）： 想喺一般 chat 嘅 model 清單揀到 GPT-6 Astra，要 Pro、Business 或者 Enterprise。用緊 Plus（US$20）一樣有 Astra，但淨係喺 Work 同 Codex mode 入面，唔喺一般 chat。Plus 大概每 5 個鐘得 5 至 45 個 Astra message，而一個 build 隨時行 20 至 40 分鐘 —— 即係每一句都好貴，當佢係計錢咁用。
• Higgsfield（出圖出片）： 官方寫明要有 active 嘅付費 plan，免費 web tier 開唔到個 plugin。Starter US$19／月 270 credits；Plus US$59（年繳 $47）1,200 credits；Ultra US$129（年繳 $99）3,000 credits。

唔好貪平揀 Starter。 Starter 用唔到 Seedance 2.5，而 Seedance 2.5 就係佢哋自己個旗艦產品同 UGC 示範背後嗰個 model。揀咗 Starter，呢份指南有一半你做唔到。Plus 先係真正嘅入門位。

以下所有價錢同限制，係 2026 年 9 月寫呢篇嘅時候嘅資料。呢類工具改 plan 改得好密，真係畀錢之前，自己撳入去 check 返最新。

三個會靜靜雞燒錢嘅位

• 「Unlimited」喺 plugin 度唔 work。 官方原文：經 MCP、ChatGPT plugin 或者 CLI 嘅每一次生成，都照標準價扣 credit。Unlimited 淨係喺佢哋個網站入面有效。
• 所有公佈價，都係「第一次試」嘅價。 佢哋自己個 blog 都寫，實際上一條用得嘅片，通常要試三至十次。生成咗但出嚟唔啱用，係唔會退 credit 嘅 —— 因為技術上佢成功咗。淨係完全出唔到嘢先會退返。
• 冇 hard cap。 用爆咗唔會自動停，所以個 guard 要你自己落。

換返做錢：Plus 1,200 credits 收 US$59，即係一個 credit 大約 5 美仙。一條 15 秒、1080p 嘅 UGC 廣告 270 credits，大約 US$13，食咗你成個月 22%。一條 30 秒 cinematic single take 540 credits，大約 US$27，即係成個月 45%。呢啲係佢哋自己跑出嚟公佈嘅數字 —— 記得再乘五，先係你真正會畀嘅錢。

由而家開始，每次你要生成任何圖或者片之前，先話我知今次大約要用幾多 credit、點解要咁多，然後停低，等我覆「OK」先好做。
我未 confirm 嘅，一律唔好生成。

生成之前，先用文字講一次你打算做咩：
・鏡頭同畫面入面有咩
・幾多秒、咩比例、咩解像度
・揀邊個 model，點解係佢
・預計幾多 credit
我睇完可能會改。傾掂咗先好生成 — 唔好用生成嚟試錯。

六步裝好個 plugin

1. 開 plugin 目錄：去 chatgpt.com/plugins，或者撳左邊 sidebar 嘅 Plugins。
2. 搜尋 Higgsfield。
3. 加入 plugin。
4. 登入 Higgsfield。
5. 用緊 ChatGPT Plus 嘅，要轉去 Work mode —— Astra 對你嚟講喺嗰度。然後打 @ 再揀 Higgsfield，就叫到個 plugin 出嚟。
6. 做視覺嘢，reasoning 校去 Extra High。但如果純粹寫 code，Medium 通常抵啲 —— High 多數淨係令你等耐咗。

我想用 Higgsfield 做 [你想做嘅嘢]。
開始之前：
1. 確認你而家真係連到 Higgsfield 個 plugin
2. 話我知你打算用邊個 model，點解
3. 每次生成前報返個 credit 價，等我 confirm
準備好就話我知。未傾掂之前，唔好生成住。

連到但係唔郁？

• 連到咗但完全冇反應： 開一個全新 conversation，第一句就直接寫明「Higgsfield」。
• 見到 Authorization with the MCP server failed： 去 Settings → Plugins → Higgsfield，reconnect 一次。
• 生成完但搵唔到： 大約 60 秒之後會落你個 Assets 度。

試吓：出一條唔似 AI 嘅 UGC

大部分 AI 片一睇就穿，因為太靚、太順、太正中。呢個 prompt 反其道而行：手機歪咗幾度冇人扶正、構圖偏少少、打字節奏唔規律、中間有停頓、由頭到尾唔望鏡頭。啲「唔完美」係要你明明白白寫出嚟，佢先做得到。

完全複製圖中這個人物：面容、皮膚細節、髮型、服裝，全部嚴格依照圖中所示，不得自行添加或更改。只沿用人物身份特徵，不包括燈光。
刻意保留不完美。架起的手機歪了幾度，她一直沒有扶正。構圖稍為偏離中心。保留自然的環境底噪，不要配樂，不要錄音室式的修飾。人物自然坐在電腦前工作，身體保持放鬆。她先專注望著螢幕，雙手自然在鍵盤上打字，打字速度不規律，偶爾停頓一下思考。
幾秒後，她一隻手離開鍵盤，自然伸手拿起旁邊的咖啡杯，視線仍然停留在電腦螢幕上。她喝一小口咖啡，輕微抿嘴，放下杯子，再將手放回鍵盤繼續打字。
整個過程不要望鏡頭，不要刻意微笑或擺姿勢。保留真實工作時的小動作，例如眨眼、輕微呼吸、手指停頓、視線細微移動及自然坐姿變化。動作不要過度流暢或完美，要像手機隨手拍攝到的真實工作片段。

用之前記住：張參考相應該係你自己，或者係同意咗畀你用嘅人。

再試吓：換走 talking head 嘅背景

唔使搬屋、唔使執枱、唔使租 studio。影完一條 talking head，將背景換成一間現代科技公司嘅工作室 —— 個人唔郁，淨係換間房。呢個 prompt 大半篇幅其實係喺度講「唔好改咩」：面容、髮型、服裝、動作、講嘢嘅嘴型、鏡頭角度、時間軸，全部要原封不動。換背景最易出事嘅地方，就係 AI 順手連個人都重新生成埋。

將我提供的 Talking Head 影片背景替換成一個現代、專業的高級科技公司辦公室。人物本身必須完全保持不變，包括面容、髮型、服裝、身形、動作、說話時的嘴型、手勢、鏡頭角度及原本時間軸，不要重新生成或修改人物。
新背景是一個具有電影感的現代創意工作室：落地玻璃窗、柔和自然日光、簡潔工作桌、電腦螢幕及少量科技感元素，背景有自然景深及輕微散景。整體感覺像專業 AI / 科技公司的創作者工作室，premium、真實、簡潔，不要像 stock photo。
重新匹配人物與新環境的光線、陰影、色溫及邊緣，使人物自然融入場景。保留原影片所有人物動作及相機運動，只更換背景。

最尾嗰段（重新匹配光線、陰影、色溫同邊緣）唔好刪。少咗佢，個人會好似貼上去咁，一眼睇得出。

喺 ChatGPT 入面做唔到嘅兩樣嘢

獨立嘅音訊生成同 Website Building，喺 ChatGPT 個 plugin 度係做唔到嘅。你可以喺生成條片嗰陣連對白一齊出，但單獨嘅旁白、voice cloning、配音就唔得。要做呢啲，就返去 Higgsfield 個網站，或者改為接去 Claude。