AI 分五個階段做你嘅私人導師：先考你，搵出你嘅弱點，再針對嗰個弱點教你。你可以直接複製以下 Prompt，將 [ ] 入面嘅資料改成你（或小朋友）嘅情況，再貼入 Perplexity 或者任何 AI Chatbot 使用。
🎯 五個階段點運作
第一階段：出題 — AI 出十條診斷題，唔准畀答案，你自己作答先。
第二階段：診斷 — 逐題批改，講出你缺咗邊個「底層概念」（唔係「積分唔得」，係「開方式嘅換元法唔識」），再按緊急程度排序。
第三階段：重教 — 最弱嗰三個概念，當你從來未學過咁重新教一次，每個配一條例題。
第四階段：再測 — 出新題，要更難，仲要打亂順序，等你唔可以靠估。
第五階段：循環 — 仲係錯？返去第三、四階段，換個角度再教過、再出新題，直到你識為止。識咗就放入複習清單，話返你幾時要再溫。
最關鍵嗰句係 「你唔准跳階段」。冇咗呢句，AI 好大機會第一 message 就將答案同解釋一次過吐晒出嚟——咁就變返「幫我溫書」，冇晒診斷嘅價值。
💬 個 Prompt
你係我嘅 [科目] 導師。我讀緊 [年級]，距離考試仲有 [X] 日。 我哋會分五個階段進行，你唔准跳階段。開始之前，請先確認你明白。 第一階段：診斷測驗 出十條診斷題畀我，範圍涵蓋 [列出單元／課題]。 多項選擇同短答題混合，難度要貼近真實考試水平。 唔好畀答案。我會喺下一個 message 交答案畀你。 第二階段：批改同診斷 我交答案之後，逐題批改。 凡係我答錯、或者答啱但理由錯嘅題目，指出我究竟缺咗邊個具體概念——唔係淨係講個課題名，而係背後嗰個底層原理。 再按我剩低嘅時間，將我啲弱點由最緊急排到最唔緊急。 第三階段：重新教學 揀我最弱嗰三個概念，當我從來未學過咁由零教一次。 每個概念配一條完整嘅示範例題。 講得精簡啲，唔好加廢話。 第四階段：再測 每個弱概念出五條新練習題（合共十五條），難度要高過第一次診斷測驗，而且要打亂次序混合埋一齊，等我唔可以靠題型估答案。 唔好畀答案。我會交答案畀你。 第五階段：確認掌握或者循環 批改第二輪。 如果我仲係答錯某個概念，就將嗰個概念再走一次第三同第四階段，但要換一個解釋角度、出全新嘅題目。 如果我已經掌握咗，就將佢移去「間隔複習清單」，並且根據遺忘曲線話我知幾時應該再溫一次。 由第一階段開始。等我交答案先再繼續。
📝 最後一步：整理你嘅個人筆記
五個階段跑完，最值錢嘅嘢唔係個分數，係「你原本係點樣諗錯咗」。呢樣嘢淨係存在喺嗰個對話窗，你一閂就冇。所以最後再行多一句 prompt，將成段對話變成你自己嘅筆記——重點唔係抄低正確答案（課本有得抄），而係抄低你自己嗰套錯誤邏輯，同埋下次見到咩訊號就要停一停。
第六階段：整理我嘅個人筆記。 根據我哋頭五個階段嘅全部內容——我答錯咗啲乜、點解會咁諗、你重新教過邊幾個概念、以及我第二輪嘅表現——幫我整理一份只屬於我嘅溫習筆記。 規則： 1. 只准用呢次對話出現過嘅內容。唔好加新例題，唔好補充我哋冇傾過嘅嘢。 2. 每個概念寫成一格，入面包括： ・一句話解釋個概念，當我三個月之後咩都唔記得咁寫 ・我當初點樣答錯、點解會咁諗（寫返我個錯誤邏輯，唔係淨係寫正確答案） ・一條例題連解題步驟 ・一句「下次見到咩訊號，就要諗返呢個概念」 3. 最後加兩個清單： ・我嘅慣性錯誤（例如漏咗單位、負號、審題太快） ・間隔複習時間表：邊個概念、邊一日要再溫 4. 用繁體中文，精簡，可以直接貼入 Notion 或者備忘錄。唔好寫鼓勵說話，唔好寫總結廢話。 寫完之後，用一句話答我：呢份筆記入面，邊個概念係我仲未真正證明到自己識？
「只准用呢次對話出現過嘅內容」呢句唔好刪。AI 好鍾意順手補多幾條例題，但你未做過嘅題目，唔係你嘅筆記。
🔍 點解建議用 Perplexity
Perplexity 每個答案都會附上出處連結，你可以㩒入去核實佢講嘅嘢有冇根據。
溫書最大嘅風險，唔係學得慢，而係 學錯咗都唔知——尤其係定義、公式、歷史年份呢類細節。有出處連結，你就有得驗證。
當然，用 ChatGPT、Claude、Gemini 一樣做到呢五個階段。分別只係你要自己揾多一步去核對。
💡 小貼士
資料填得越清楚，AI 出嘅題就越貼地：
- 科目 + 年級 — 等 AI 知道難度水平（例：中三數學、小五常識、DSE 生物）
- 具體單元 — 唔好只寫「數學」，要寫「二次方程、因式分解、坐標幾何」
- 剩低幾多日 — 影響佢點排優先次序
- 貼返課程大綱或者課本目錄 — 出題會準好多
最常見嘅失敗原因： 忍唔住叫 AI 一次過畀晒答案。診斷題嘅價值就係喺你答錯嗰一刻——答錯先知邊度係真係唔識，而唔係「以為自己識」。
🎮 進階小貼士：將診斷測驗變成一個遊戲
有啲小朋友，一見到「診斷測驗」四隻字就已經唔想開始。第一階段出咗十條題目之後，可以叫 AI 將嗰十條題包成一個結他英雄風格嘅小遊戲：題目化成音符跌落嚟，落到判定區就揀答案，答啱加分。玩完之後個遊戲會將作答結果整理成 JSON，複製返出嚟貼入對話框，就照樣行到第二階段嘅批改同診斷——即係話，玩完個 game，診斷嘅價值一樣冇走漏。
請幫我編寫一個單一檔案的 HTML 網頁遊戲（包含 Tailwind CSS、Google Fonts、JavaScript），作為 [年級][科目][列出單元／課題] 的結他英雄風格診斷測驗。 設計與功能要求： 1. 【整體風格】：Cyberpunk / 霓虹電玩風格，深色背景（#0b0f19）、亮麗嘅霓虹色調（青色、粉紅、黃色），配合 Orbitron 及 Noto Sans TC 字體。 2. 【遊戲機制（結他英雄模式）】： - 畫面中央為一個直立音符軌道（有三條音軌線）。 - 題目會化作音符由上方緩慢落下（速度要適中偏慢，確保學生有足夠時間閱讀題目）。 - 當音符落到下方判定區時，下方會列出 4 個選項（例如 [選項 1] 排列順序：①④③②）。 - 學生點擊正確的排列順序選項。答對加 100 分，答錯或逾時會扣分／顯示提示。 3. 【題目內容】： - 題目由第一階段嗰十條診斷題轉化而成，每題係一個「排列順序」題（例如實驗步驟、歷史事件、解題步驟嘅先後次序）。 - 每題提供 4 個順序選項（如 ①③④② 等）。 4. 【總結與交卷功能】： - 完成 10 條題目後，跳出結算畫面，顯示詳細的作答報告（列出每題的題目、你的選擇、正確順序）。 - 提供一個「📤 提交答案進入第二階段」按鈕，點擊後會自動將作答結果（JSON 格式）複製到剪貼板，並彈出提示引導學生將答案貼到對話框中進行第二階段（批改與診斷）。 5. 【技術規範】： - 必須是完全自包含的單一 HTML 檔案，可以直接在瀏覽器預覽。 - 響應式設計（Responsive），手機同電腦都玩到。
兩件事要知：呢個 prompt 出嘅係「排列順序」題（實驗步驟、歷史事件先後嗰類）。科目唔啱用排序嘅，將 prompt 入面嘅「排列順序選項」改成「四選一」就得。另外，AI 寫完成段 HTML 之後，複製晒佢、存做一個 .html 檔案，用瀏覽器打開就玩得。
👨👩👧 家長點用
- 第一次陪小朋友一齊開，示範一次點答、點交答案畀 AI
- 第二階段嘅診斷結果，就係你了解佢弱點嘅最好報告——可以 screenshot 保存，同老師傾嘅時候用得着
- 第五階段嘅複習清單，可以抄落日曆，變成實際嘅溫書時間表
最後提醒： AI 係陪練，唔係代你入考場嗰個。佢出嘅題、佢畀嘅答案，最後把關嗰個人一定要係你（或者家長）。唔好盲信 AI，但一定要識用 AI。
